أهلنا ، حبايبنا ، البـِـعـِــزُّونا :
صباحمن ومساكم ورد :
دا الدرس التاني في الفوتو بن شوب ، وخلونا كدا نتكلم بي كلام أهلنا ناس لا غادي اخير لينا ،
الدرس دا خاص بال Layers أو الطبقات ، وشغل الفوتوشوب يعتمد إعتماد كلي على الطبقات ،



أول شئ : ظاهر عندنا في أعلى يسار الصورة سهم وعليه كلمة layer options ودا خاص بي خيارات الطبقة ، يعني إذا عاوز أدمج طبقتين ( يعني الصق طبقتين يا مشــــــاكس ) بستخدم الحتة دي ( خيارات الطبقات ).
ونجي للأماكن العليها أرقام:
1- Layer Opacity : ودي درجة إعتام أو تفتيح لون الطبقة الأنا شغال عليها ..
2- شكل العين دا ، لو ضغطت عليه ، تختفي الطبقة ، يعني لو العين ما ظاهره معناها الطبقة دي ما نشطة.
3- دا بنسميه ال Mask اي القناع ، ودا بنستخدمه في دمج الصور مع بعض أو عمل أشكال تكون شبه مختفية في الصورة.
4- ADD Layer ودا لإضافة طبقة جديدة لحق العمل ( وحقل العمل يعني المساحة أو المسرح الأنا شغال عليه يا ولد يا مشاكس أفندي ).
5- Delete Layer ودا لحذف اي طبقة من الطبقات ، ويجب أن تكون الطبقة نشطة لكي يتم حذفها.
طيب ،،،،،
موضوع الطبقات دا بيعتمد عليه الشغل كله ، يعني المفروض إنك تكون عارف نفسك شغال في ياتو طبقة من الطبقات ، لو شغال مثلاً في الطبقة الأولى أو الخلفية ، لازم تضغط عليها بالماوس عشان تكون نشطة.، ويكون شكلها زي Layer 3 في الصورة العندنا دي ..
***** وبعدين يا جماعة لما افتح برنامج الفوتوشوب:
بعمل أول حاجة ملف جديد ، يعني أفتح قائمة File وأختار New..
بعد داك أقوم أحدد مساحة العمل بتاعتي ، يعني الصورة الأنا عاوز أعملها يكون طولها كم وحجمها كم ؟
زي مافي الصورة دي مثلاً:



كدي في الأول خلونا نشتغل بي نفس الإعدادات الموجودة دي ..
ولحدي هنا نقيف ونشوف الناس مواصلين معانا ولا أنا ( بنفخ في قربة مقدودة يا مشاكس أفندي )..
بالله يا شباب خليكم معانا ، والله الشغل دا لي قدام قمة في المتعة ..
ولو في زول عندو سؤال لحدي هنا يقوم يسال طـوالي يا أخواننا ، عشان كلنا نستفيد ونتدارك الأخطـاء ..
تحياتي ، ونتقابل في الحصة الجاية .. ونبدأ فيها شغل طـوالي ..